[信報財經新聞] Prada涉「篤數」疑雲

2011-05-02
意大利名牌Prada 計劃7 月來港上市,一間公司,上市時係最脆弱的時候。最近,爆出一單涉嫌歧視女性醜聞,有日本分店前員工告Prada 無理解僱、降職及性騷擾,更具殺傷力係Prada 強迫女售貨員買手袋「篤數」,呢個指控認真係可大可小。
Prada 今次上市預計集資117 億至156億港元。凌通翻查資料,發現Prada 盤數都幾靚,舊年全年純利大升一倍半,至約2.5 億歐羅,息稅及折舊前盈利按年大增八成半。
案中事主Rina,知道Prada 將來港上市,於是聯絡香港工會及婦團,決定今日人流最多尖沙咀分店門外抗議,佢地會向Prada 公關遞信要求解釋及交代,之後仲會去信港交所(388)要求交代申報問題。
亞洲跨國企業監察網絡發言人鍾明麗話,呢單官司發生之後,Prada 日本都無向傳媒公眾交代事件,今次行動主要目的並非針對上市,而係因為香港係國際金融中心,所以要維持高透明度,保障公眾知情權。
早前有報道話,Rina Prada 工作期間受到高層性騷擾,又要求佢辭退15 名「又老又肥又醜」的管理層員工,仲要求她本人減肥,事主之後不斷去信米蘭CE O 投訴,但最後被炒魷。Rina09 年向東京地方法院提訴,去年也到聯合國大會上控訴。Prada 方面否認全部指控,並反指佢講大話。單案東京法院最遲今夏判決,屆時事主或到港開記招。
Prada 上市,波折重重,過去十年間屢敗屢戰。對於呢單官司,凌通曾嘗試聯絡Prada 發言人回應,但最尾都搵唔到。
凌通[email protected]