[蘋果日報] 隔牆有耳:Prada上市舊部抗議

名牌Prada喺香港上市,是是非非亦隨之而來。日本分公司前高層指Prada對女員工性別歧視同性騷擾,告上法院,Prada則反控誹謗,呢位曾喺名店工作嘅女子博夫里斯(Rina Bovrisse)嚟咗香港,噚日聯同日本婦女勞工行動中心代表到Prada尖沙嘴分店踩場,抗議Prada「賺女人錢卻歧視女人」,更將一對Miu Miu鞋丟在地上狂踩,好捨得。
博夫里斯原本係Prada日本分公司高級零售營運經理,佢指高層巡舖時,認為15名員工外貌欠佳,於是調佢哋去較偏遠分店,變相逼人辭職,博夫里斯覺得Prada咁樣嫌棄「又老、又肥、又醜」女員工好離譜,於是告上法院,Prada唔客氣,反控告誹謗。
亞洲跨國企業監察網絡及香港新婦女協進會代表噚日亦有到場聲援,佢哋話港交所竟然批准Prada上市好驚訝,促請港交所同平機會介入出句聲。係咁啫,佢哋冇咁天真咁儍,叫人罷買。